Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

САВОЛ. Ассалому алайкум, Шайх ҳазратлари. Ушбу сайтни кўриб, жуда мамнун бўлдим. Мени анчадан бери қийнаётган савол билан сизга мурожаат қилмоқчиман. Жавоб учун олдиндан раҳмат. Аллоҳ сиздан рози бўлсин. (Балки бундай саволга жавоб бергандирсиз). Мен 2 ойлик келинлигимда қайнонам билан келиша олмай, уйдан кетдим. Бўйимда ҳомилам бор эди. Шу бўйи куёвим билан мутлақо учрашмадик. Хатто телефон орқали ҳам гаплашмадим.

Ҳозир фарзандли бўлдим. (Улар эгизак.) Аммо қайнонам, орага талоқ тушган, деб, куёвимни, умуман, яқинлаштирмаяпти. Фарзандларим ҳозир 3 ойликдан ошиб қолишди. Мен ўшандан бери онамникидаман. Айтинг-чи, ҳурматли Шайх, биз ҳозирда куёвим билан 10 ойдан ортиқроқ вақт мобайнида кўришмадик. Орага ростдан ҳам талоқ тушганми ва фарзандларим ҳам отасига бегонами?

ЖАВОБ: Бисмиллаҳир Роҳманир Роҳим. Эр талоқ қилмаса, ўз-ўзидан талоқ тушиб қолмайди. Сизлар ярашишни тезлатинглар, болаларингизни биргаликда тарбия қилинглар. Ота-оналарингиз ҳам Аллоҳдан қўрқсинлар. Сизларнинг орангизда ғов бўлмасинлар. Қайтага, ёшларга насиҳат қилиб, яраштириб қўйсинлар. Валлоҳу аълам.