Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
2016 йил йилдан бошлаб, ҳар йили 11 феврал куни БМТ қарорига биноан “Халқаро илмда аёллар ва қизлар куни” сифатида нишонланади. Бундан кўзланган мақсад, аёлларимизнинг илм-фандаги салоҳиятига эътибор қаратиш ва қўллаб-қувватлашдан иборат.
Шариатимизда илм талаб қилиш ҳар бир муслим ва муслимага фарздир. Қуръони каримда “илм” сўзи 765 маротаба такрорланади. Ислом тарихида ҳам аёл олимларининг фаолияти жуда кенг бўлган. Замонамиз мусулмон аёлларининг муайян қийинчиликларга қарамасдан илм-фан, технология, ижтимоий фаолиятда юксак мукофотларни қўлга киритганлари ҳам бир талай. Саҳифаларимизни кузатиб боринг, улар ҳақида маълумотлар бериб борамиз.
Самира Иброҳим Ислом
Профессор Самира Иброҳим Ислом Саудия Арабистонидан келган фармаколог ва мусулмон олими.
У Қирол Абдулазиз университети қошидаги Қирол Фаҳд тиббиёт илмий-тадқиқот марказининг Дори-дармонларни мониторинг қилиш бўлимининг бошлиғи. Самира хоним Саудия Арабистонида аёллар учун расмий университетда таълим бериб, унинг бу фаолияти таълим ривожланишида муҳим аҳамият касб этади. У 2000 йилда ЮНEСКО томонидан таниқли олим сифатида тан олинган, унинг тадқиқотлари дорилар хавфсизлиги дастурини ишлаб чиқишда муҳим омил бўлган.
Несрин Гаддар
Несрин Гаддар ‒ Ливанлик муҳандис-механик, Американинг Байрут Университетининг машинасозлик профессори, “Амалий механика” журналининг муҳаррири ва Ислом Жаҳон Фанлар академиясининг илмий ходими.
Доктор Гаддар амалий энергия, энергетик тадқиқотлар ва биотехнология соҳаларида ихтисослаштирилган ўқув дастурлари ва лабораторияларини ишлаб чиқишда пешқадамлардан бўлган. 2014 йилда у “Shaper of Energy Future”нинг Ислом дунёсида илм-фан соҳасидаги “Энг нуфузли 20 та аёл” рўйхатига киритилган.
