Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

  Толеъ йўқи жонимға балолиғ бўлди, Ҳар ишники, айладим – хатолиғ бўлди. Ўз ерни қўйиб, Ҳинд сори юзландим, Ё Раб, нетайин, не юз қаролиғ бўлди?! *** Давлатқа етиб, меҳнат элин унутма, Бу беш кун учун ўзунгни асру тутма! Борғонни, кел, эмди ёд қилмай, эй дўст, Бориш-келишингни лутф этиб, ўксутма! *** Бесабрмену бесару сомондурмен, Бир ғамзададурмену паришондурмен. Не диннинг ишин қилдиму не дунёнинг, Ё Раб, нетай, ўз ишимга ҳайрондурмен. *** Беқайдмену хароби сийм эрмасмен, Ҳам мол йиғиштирур лаим эрмасмен. Кобулда иқомат этти Бобур дерсиз, Андоқ демангизларки, муқим эрмасмен. *** Аҳбоб, йиғилмоқни фароғат тутунгиз, Жамиятингиз борини давлат тутунгиз! Чун гардиши чарх будурур, Тенгри учун, Бир-бирни неча куни ғанимат тутунгиз! *** Ҳар кимки вафо қилса, вафо топқусидур, Ҳар кимки жафо қилса, жафо топқусидур! Яхши киши кўрмағай ёмонлиқ ҳаргиз, Ҳар кимки ёмон бўлса, жазо топқусидур! *** Кўпдин бериким, ёру диёрим йўқтур, Бир лаҳзаю бир нафас қарорим йўқтур. Келдим бу сори ўз ихтиёрим бирла, Лекин боруримда ихтиёрим йўқтур.