Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Зино, роса катта гуноҳ. Биз кўпчилик зинони эркак ва аёлнинг ношаръий қўшилиши деб тушунамиз. Лекин, зинога яқин – ўпишиш, қучоқлаш, кўз билан ёмон қараш, гап отиш каби ишлар ҳақида нима дейсиз? Бунинг гуноҳи тавба билан ювиладими ёки буларга ҳам жазо белгиланганми? Бундай иш қилганлар нима қилиши керак? Каффорати қандай?

 ЖАВОБ: Бисмиллаҳир Роҳманир Роҳиим                                                                                                    Ўпса, ушласа ёки назар қилса, ҳақиқий зино собит бўлмайди. Албатта, бу каби ношаръий ишларнинг гуноҳи зиноникича бўлмайди. Шунинг учун уларнинг жазоси ҳам зиноникидан озроқ бўлади. Мазкур гуноҳлар зинонинг дебочаси, кўприги бўлиш билан бирга, улар ҳам қайсидир маънода «зино» деб аталиши бор. Масалан, «қўл зиноси», «кўз зиноси», «қулоқ зиноси» каби. Бу каби ҳолатларда исломий маҳкама томонидан таъзир маъносидаги керакли жазолар берилади. Агар ўшандай жазолар берилса, улар гуноҳ учун каффорат бўлади. Шу билан бирга, гуноҳ қилган шахс Аллоҳ таолога тавба қилиши, гуноҳ ишларга қайта яқинлашмаслиги керак. Агар мазкур гуноҳларга қўл урган кишига таъзир маъносидаги жазолар берилмаган бўлса, у ҳолда, гуноҳ қилган шахс Аллоҳ таолога чин дилдан қаттиқ тавба қилса, У Зотдан мағфират сўраса, ўша гуноҳни қайта қилмасликка қасд қилса ва уни ювадиган даражада яхши амалларни бажарса, иншааллоҳ, ушбу ишлар унинг гуноҳи учун каффорат бўлади, деб умид қилинади. Валлоҳу аълам.