Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Қаноатнинг иккинчи маъноси шуки, инсон Аллоҳ таоло берган нарсага, яъни ўзгартиришнинг иложи йўқ бўлган нарсага рози бўлишидир. Қўлидан келмаган нарсани орзу қилиб яшамайди. Бошқаларга берилиб, унга берилмаган нарсага кўз тикиб ҳаёт кечирмайди. Масалан, қари киши ёш йигитдек қувватга эга бўлишни орзу қилгани, бўйи паст йигит бўйи баланд кишига ҳасрат ва надомат билан қараши каби!
Солиҳлардан бири айтди: “Эй Одам боласи, Аллоҳ таолонинг хазинаси тўла экан, ризқинг тор бўлиб қолишидан қўрқма! Унинг хазинаси ҳеч қачон тугамайди. Аллоҳдан Ўзгага боғланма. Агар Ундан ўзгага боғлансанг сен барча яхшиликлардан қуруқ қоласан. Аллоҳ сенга тақсимлаб берган нарсага рози бўл! Бу билан нафсинг ва баданинга роҳат берасан. Ундан эртанги куннинг ризқини сўрама! У сендан эртанги куннинг ибодатини сўрагани йўқ-ку! У Ўзига исён қилганларни унитмайди, қандай қилиб итоат қилган бандаларини унутсин?! У барча нарсага қодир зотдир!”
Доктор Ҳассон Шамсийнинг "Бахт улашинг" китобидан
Раҳматуллоҳ Махсумхонов таржимаси
