Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

  Масаллиқ: 1 кг ун, 50 гр хамиртуруш, 2 стакан сув, 300 гр жизза, 2 чой қошиғида туз солинади.

Уй нонининг тўқ тутарлигини орттириш ва лаззатини яхшилашга қаратилган бу нон унутилиб бормоқда. Сабаби, ҳамма вақт ҳам ҳар бир хонадонда жиззанинг бўлавермаслигидир. Жиззанинг куйганларини териб ташлаб, (саралаб) шундай дона-доналигича хамирга қўшилади. Хамиртуруш билан тузни илиқ сувда эритиб, ун ва сувни сиқим-сиқимлаб қўшиб, қаттиқ-юмшоқлиги ўртача бўлган хамир қорасиз ва ошириш мақсадида ўраб, иссиқроқ жойга олиб кўясиз. Кўпчиган хамирни тоғоранинг ўзида муштлаб, сўнгра тахта устига олиб, кўл билан қалинлигини 1,5-2 см қилиб ёясиз. Ёйманинг юзига текис қилиб жиззани солинг ва хамирнинг бир чеккасидан рулет қилиб ўранг. Ўралган хамирга жизза яхши аралашиши учун рулетнинг икки чеккасидан кафтлар билан эшасиз, бунда ўнг кафт орқага, сўл кафт эса олдга бир неча бор ҳаракат қилдирилади. Ана шундан сўнг 150-200 гр келадиган зувалаларга бўлиб чиқасиз Шар шаклида думалатилган зувалаларни ўнг қўлнинг мушти билан, сўнг ҳар иккала қўлнинг кафти ва бармоқлари билан эзиб доира шаклидаги нон ясайсиз. Ноннинг четлари 2-3 см, ўртаси эса 1 см қалинликда бўлсин. Ҳар бир ноннинг ўртасида чакич уриб, тандирга ёпиб то сингигунча пиширасиз. Дастурхонга тортишдан олдин бир оз тобини чиқариб, мустақил таом сифатида чой билан келтириб қўясиз.